反思自省｜柒出國際超級失禮 香港人旅行心態

好幾次，在異鄉遇上香港人。好多人都說在外地遇上同聲同氣的人特別有親切感，但我真實感受是很想很想扮聽唔明佢地講緊咩，男朋友聽到好高音嘅中文頻律都會問我佢地係咪香港人，但我每次都靜靜雞「o薯」佢叫佢收聲，因為真係好失禮好失禮好失禮。

「下，條隊咁長不如搏大霧扮check咗in打尖囉！」

「下，乜原來咁多人一齊去架？」

「下，搵笨既！」

「下，我係香港好過呢度多多聲囉！」

---

先生小姐，如果香港咁好其實你真係可以留係屋企唔好哂錢去旅行又一直呻架！

每次去到外地，聽到香港人開聲十次有九次唔係抱怨就係投訴，企係超級高地大大聲批評人地文化、環境、生活習慣。

再唔係就批評點解參加個Tour嫌三嫌四，唔係嫌多人就係嫌人唔夠好服侍。係咁巴閉不如你自己包一團啦，其實你標準係咪最好？你係咪最有文化？

試過係冰島參加極光團，本來開車時間係八點但都未開車，點解嘅點解嘅？因為有人遲到囉，通常十次有八次都見到係香港人啊:) 行程整體安排其實我覺得安排得幾好，如果用冰島物價 Bus Tour算係平（usd$50) ，導遊貼心講解，仲guarantee你當日睇唔到兩年來可以免費再黎用到睇到為止但我好深刻後面個香港人即刻大大聲同隔離講，

「當我on9咩，兩年來我都唔會再黎睇啦，比我有乜撚用！扮曬野!」

其實小姐人地好心比個Service你，都唔係必然架！你可唔可以正面少少睇件事，睇唔睇到極光係天意，控制唔到，但人為都盡量配合，盡量補救，以減少顧客失望。但香港人就係中意咩都負面去猜度人地，投訴又唔滿意。

去旅行遇到外國人，佢地都係用好欣賞嘅眼光一個地方文化，去讚美該地方可愛之處，但每次我見到香港人，佢地都係好不屑，好想同呢班人講，其實咁唔中意點解要黎？為影張相打卡不如Photoshop算啦，唔好比少少錢以為自己大爺兩星級價錢又要求五星級享受啦好嘛？如果大家去旅行一直用咁嘅心態，你永遠無可能做到放眼世界，感受世界角落嘅和而不同。

雖然我知道大家係香港好大壓力，需要搵位發泄，但真係無需要周圍放負能量，以批評他人為樂，畢竟你一根手指頭指著別人，有三根是指向自己。改變一下心態，學習去欣賞同尊重其他國家文化，旅程會變得更快樂與可愛。